5. december 2001

IMMA 2001/04

 

Inatsisartunut Naalakkersuisunullu il.il. ilaasortat aningaasarsiaqartitaanerat il.il. pillugit Inatsisartut inatsisissaannut siunnersuut.
(Siumut aamma Atassut)

 

Saqqummiussissut

 

Inatsisartut 2001-imi Ukiakkut Ataatsimiinneranni oqaluuserisassani immikkoortoq 78-itut Inatsisartunut Naalakkersuisunullu il.il. ilaasortat aningaasarsiaqartitaanerat il.il. pillugit Inatsisartut inatsisissaannut Inatsisartut siulittaasoqarfiata siunnersuutaa Inatsisartut oqaluuseralugulu akuersissutigaat.

Piffissami siunnersuutip akuersissutigineqarnerata kingornatigut Inatsisartunut Naalakkersuisunullu il.il. ilaasortat aningaasarsiaqartitaanerat il.il. pillugit inatsisartut inatsisaata nutaap atorunnaarsinneqarnissaa inuppassuarnit piumasaqaatigineqarpoq. Siumut aamma Atassut isumaqarput inuppassuit akerliliinerat tusaanngitsuusaarneqarsinnaanngitsoq. Taamaattumik aningaasarsiat pillugit inatsisip nutaap atorunnaarsinneqarnissaanik aammalu aningaasarsiat pillugit inatsisitoqqap atortuulersinneqarnissaanik inatsisartut inatsisissaannut siunnersuummik Siumut aamma Atassut saqqummiussipput. Inatsisartunut ilisimatitsissutitut aningaasarsiat pillugit inatsisitoqaq 1993-imeersoq nuutitanngorlugu ilanngunneqarpoq.

Akerliliinerit takutippaat inatsisartuni amerlanerussuteqartut innuttaasut ilaannit amerlasoorujussuarnit allaasumik naliliisimasut. Assersuutigalugu tikkuarsinnaavarput aningaasarsiat qaffasissusiligaanerat aningaasarsiallu pillugit inatsisip nutaap ilai allat nunatsinni suliffeqarnermi pissutsinut oqimaaqatigiissaarneqangaarsimanngitsut. Akerliliinerit naaperiarniarlugit aammalu aningaasarsiat pillugit inatsisip tamanit inooqataaffigineqarsinnaasup suliarineqarnissaa pillugu inatsisartunut naalakkersuisunullu ilaasortat aningaasarsiaqartitaanerat il.il. pillugit maleruagassat iluarsaanneqarnissaannut suleqatigiissitamik pilersitsisoqarnissaanik inatsisartut aalajangiiffisisassaattut siunnersuummik Siumut Atassullu saqqummiussipputtaaq.

Taamatut oqaaseqarlutik Siumup aamma Atassutip inatsisartuni ilaasortaatitaasa Inatsisartunut Naalakkersuisunullu il.il. ilaasortat aningaasarsiaqartitaanerat il.il. pillugit Inatsisartut inatsisissaannut siunnersuut inatsisartunit akuersortumik oqaluuserisassanngortippaat inassutigalugulu siunnersuut saqqummiunneqarnermisut iluseqarluni aappassaaniigassanngortinneqassasoq.